काठमाडौं । किताब जात्राको छैटौं संस्करण शुक्रबारबाट सुरु भएको छ । लेखक र पाठकबीच अन्तरंग विमर्श हुने यस जात्राको शुक्रबार शिक्षामन्त्री विद्या भट्टराई र अर्थमन्त्री विष्णु पौडेलले उद्घाटन गरे ।
जात्राको उद्घाटन समारोहलाई सम्बोधन गर्दै अर्थमन्त्री पौडेलले ‘समृद्ध नेपाल, सुखि नेपाली’को राष्ट्रिय आकांक्षा हासिल गर्नका लागि सबैले आ–आफ्नो ठाउँबाट योगदान दिन जरुरी रहेको बताए ।
मुलुकमा राजनीतिक स्थायित्वका लागि योगदान सबैले हातेमालो गर्दै आर्थिक, सामाजिक रुपान्तरण र विकासका लागि सहकार्य गर्नुपर्ने पौडेलले बताए ।
‘आज देशको साझा उद्देश्य ‘समृद्ध नेपाल सुखी नेपाली’ हो । उक्त उद्देश्यमार्फत राष्ट्रिय आकांक्षालाई हासिल गर्नका निम्ति सबैले आ–आफ्नो ठाउँबाट राजनीतिक स्थायित्वका लागि योगदान दिन जरुरी छ । आर्थिक, सामाजिक रुपान्तरण र विकासका निम्ति पनि योगदान दिन जरुरी छ । यस राष्ट्रिय चाहनालाई शिक्षा र चेतनाको माध्यमबाट योगदान दिनका लागि सबैलाई हार्दिक धन्यावाद दिन चाहन्छु,’उनको भनाइ थियो ।
किताब जात्राको छैटौं संस्करण सुरु भएकोमा खुशी व्यक्त गर्दै उनले जात्रालाई अविचलित र अविराम अगाडि बढाउन सुझाए ।
समाजमा शिक्षा र चेतनाको स्तर उकास्नका लागि आयोजना हुने हरेक प्रकारका कार्यक्रमहरुलाई सरकारको पुर्ण साथ र सहयोग रहेको उनको भनाइ छ ।
उनले भने, ‘हामी अहिले किताब जात्राको छैटौं संस्करणमा छौं । जात्रा अविचलित र अविराम जारी रहोस् । समाजको ज्ञान, चेतना, विवेक र एकताको सर्वोपरि रुपमा रुपमा विकास गर्ने प्रयासका लागि आयोजकप्रति मुक्तकण्खले प्रशंसा गर्न चाहन्छु । यो प्रयासमा नेपाल सरकार साथमा रहेको व्यहोरा समेत जानकारी गराउन चाहन्छु । किताबका माध्यमबाट ज्ञान र विवेकलाई समाजमा सम्प्रेषण गर्ने अभिछिन्न शृंखला मानव समाजमा छ । शृंखलालाई प्रभावकारी ढंगले अगाडि बढाउने सन्दर्भमा जात्रा महत्पूर्ण छ । अझ जात्रा मौलिकतामा आधारित रहेको छ भन्ने विश्वास मैले लिएको छु ।’
