भैरहवा । सिद्धार्थनगर नगरपालिकाका प्रमुख इश्तियाक अहमद खानले ‘लैङ्गिक हिंसा विरुद्धको १६ दिने अभियान–२०८२’ को अवसरमा स्वदेश तथा विदेशमा रहेका सम्पूर्ण नेपालीमा शुभकामना व्यक्त गर्नुभएको छ ।
नगरप्रमुख खानले समाजमा व्याप्त कुप्रथा र विभेद अन्त्य गर्न परिवार, नागरिक समाज र राज्य संयन्त्रको एकताबद्ध प्रयास अपरिहार्य रहेको बताउनुभयो । उहाँले संविधानप्रदत्त लैङ्गिक समानताको हक सुनिश्चित गर्न कानुनको प्रभावकारी कार्यान्वयन र पीडितको संरक्षण तथा पुनर्स्थापनामा जोड दिनुभएको छ ।
नगरपालिकाले लैङ्गिक हिंसा अन्त्यलाई विकासको मुख्य आधार मान्दै ‘लैङ्गिक समानता नीति’ कार्यान्वयनमा ल्याएको उहाँले जानकारी दिनुभयो । उहाँले यो अभियानले ३६५ दिन नै सभ्य, सुरक्षित र न्यायपूर्ण समाज निर्माणका लागि सबैलाई प्रेरणा प्रदान गर्ने विश्वास व्यक्त गर्नुभएको छ।
