भैरहवा । रुपन्देहीमा अवैध लागुऔषधसहित दुईजना पक्राउ परेका छन् । प्रहरीले मायादेवी गाउँपालिका–२ भिलरहवाका २३ वर्षीय अक्षय कुमार हरिजन र सोही वडाका २२ वर्षीय गुलाब हरिजनलाई पक्राउ गरेको हो । जिल्ला प्रहरी कार्यालय रुपन्देहीका अनुसार, मायादेवी गाउँपालिका–६ बेथरीमा लागुऔषध कारोबार भइरहेको सूचनाका आधारमा प्रहरीले लु १० प ५८४१ नम्बरको मोटरसाइकलमा आउँदै गरेका उनीहरुलाई रोकेर चेकजाँच गरेको थियो ।
चेकजाँचका क्रममा उनीहरुको साथबाट Diazepam, Buprenorphine र Promethazine गरी १५० एम्पुल इन्जेक्सन बरामद भएको डीएसपी सुरज कार्कीले जानकारी दिनुभयो । प्रहरीले मोटरसाइकलसहित दुवैजनालाई नियन्त्रणमा लिएर थप अनुसन्धान गरिरहेको छ ।
