धकधई । रोट्रयाक्ट क्लब अफ सेन्ट्रल रोहिणीको आयोजनामा धकधई खानेपानी तथा सरसफाइ संस्थामा "ग्रीन रोहिणी" नामक वृक्षारोपण तथा बिरुवा वितरण कार्यक्रम सम्पन्न भएको छ। वातावरणलाई हराभरा बनाउने उद्देश्यका साथ आयोजित सो कार्यक्रममा ४०० भन्दा बढी बिरुवा वितरण गर्नुका साथै वृक्षारोपण समेत गरिएको छ।
रोटरी डिस्ट्रिक्ट ३२९२ को एक लाख बिरुवा रोप्ने अभियान अन्तर्गत आयोजना गरिएको उक्त कार्यक्रम रोट्रयाक्ट क्लब अफ सेन्ट्रल रोहिणीका अध्यक्ष रुद्रराज सिग्देल, रोटरी क्लब अफ सेन्ट्रल लुम्बिनीका अध्यक्ष गङ्गाधर भण्डारी, धकधई खानेपानी संस्थाका अध्यक्ष अनिल कुमार कौशल र क्लबका संस्थापक अध्यक्ष रामकृष्ण बराल लगायतका अतिथिहरूको उपस्थितिमा सम्पन्न भएको हो ।
कार्यक्रममा क्लबका बोर्ड सदस्य, साधारण सदस्य तथा धकधई र कदमहवा क्षेत्रका सर्वसाधारणको उपस्थिति रहेको थियो। सो अवसरमा क्लबका अध्यक्ष सिग्देलले वातावरण संरक्षण र सामाजिक सकारात्मक परिवर्तनका लागि यस्ता अभियान फलदायी हुने बताउँदै वृक्षारोपण अभियानमा सक्रियतापूर्वक सहभागी हुन सम्पूर्णमा आग्रह गर्नुभयो।
