काठमाडौँ, साउन २७ — सरकारले देशैभरका सरकारी निकायमा प्रयोग हुने निवेदनको ढाँचामा एकरूपता ल्याउन नयाँ मार्गदर्शन स्वीकृत गरी कार्यान्वयनका लागि निर्देशन दिएको छ। प्रधानमन्त्री तथा मन्त्रिपरिषद्को कार्यालयले ‘सरकारी कार्यालयमा प्रयोग हुने निवेदनको ढाँचा तथा सोको कार्यान्वयन मार्गदर्शन, २०८३’ स्वीकृत गर्दै मातहतका सबै निकायमा लागू गर्न निर्देशन दिएको हो।
यस निर्णयसँगै नागरिकले कार्यालयपिच्छे फरक-फरक तरिकाले निवेदन लेख्नुपर्ने झन्झट र अन्योल अन्त्य भई देशभर एउटै निश्चित ढाँचा कायम हुनेछ। सार्वजनिक सेवा प्रवाहलाई थप सरल, सहज र नागरिकमैत्री बनाउने उद्देश्यले ल्याइएको यस व्यवस्थाले परम्परागत कागजी प्रक्रियालाई क्रमशः अनलाइन, मोबाइल एप तथा डिजिटल माध्यममा रूपान्तरण गर्दै ‘डिजिटल नेपाल’ को परिकल्पनालाई समेत बल पुर्याउने विश्वास लिइएको छ।
