रौतहट । रौतहटमा स्रोत नखुलेको ५ लाख २२ हजार ४९० रुपैयाँ नगदसहित दुई जनालाई सशस्त्र प्रहरीले पक्राउ गरेको छ । राजदेवी नगरपालिका–८ स्थित सोफियामाई मन्दिर क्षेत्रबाट भारतबाट नेपालतर्फ आउँदै गरेका उनीहरूलाई सशस्त्र प्रहरी बल नेपाल, बीओपी बेलबिछवाको सीमा गस्ती टोलीले नियन्त्रणमा लिएको हो । भारतबाट नेपालतर्फ आउँदै गरेको विआर ०६ एक ६२९२ नम्बरको मोटरसाइकललाई शंका लागेर जाँच गर्दा उक्त परिमाणको नेपाली रुपैयाँ बरामद भएको सशस्त्र प्रहरीले जनाएको छ । पक्राउ पर्नेहरूमा भारतको बिहार राज्य, सितामढीका ४५ वर्षीय नजिर नट र सर्लाहीका ५५ वर्षीय मुम्ताज अन्सारी रहेका छन् ।
सशस्त्र प्रहरी सीमा सुरक्षा गुल्म गौरका प्रमुख डीएसपी प्रेम सागर बिष्टका अनुसार चेकजाँचका क्रममा नटको साथबाट ३ लाख २२ हजार र अन्सारीको साथबाट २ लाख ४ हजार ४९० रुपैयाँ फेला परेको थियो । बरामद गरिएको उक्त रकमको वैधानिक स्रोत खुलाउन नसकेपछि उनीहरूलाई नियन्त्रणमा लिइएको हो । पक्राउ परेका दुवै जनालाई बरामद नगद र मोटरसाइकल सहित आवश्यक कारबाहीका लागि जिल्ला भन्सार कार्यालय गौरमा बुझाइएको डीएसपी बिष्टले जानकारी दिएका छन् । सीमा क्षेत्रमा हुनसक्ने अवैध कारोबार र तस्करी नियन्त्रणका लागि सशस्त्र प्रहरीले सक्रियता बढाएको उनले बताए ।
