भैरहवा । जिल्ला प्रशासन कार्यालय रुपन्देहीले जेन जी आन्दोलनका क्रममा घाइते भएका व्यक्तिहरूलाई सम्पर्कमा आउन अनुरोध गरेको छ। जिल्ला स्तरीय सहजीकरण समितिबाट घाइते तथा अपाङ्गताको वर्गीकरण गर्नुपर्ने भएकोले प्रशासन कार्यालयले सोमबार एक सूचना जारी गर्दै घाइते भएका व्यक्तिहरूलाई ७ दिनभित्र सम्पर्कमा आउन अनुरोध गरेको हो।
रुपन्देहीका सहायक प्रमुख जिल्ला अधिकारीद्वारा जारी गरिएको सूचनामा भनिएको छ, 'जेन जी प्रदर्शनका घाइतेहरूको वर्गीकरण सम्बन्धी कार्यविधि, २०८२ अनुसार गठित हुने जिल्ला स्तरीय सहजीकरण समितिबाट घाइते तथा अपाङ्गताको वर्गीकरण गर्नुपर्ने भएकाले उक्त आन्दोलनका क्रममा घाइते भएका व्यक्तिहरूले नेपाली नागरिकताको प्रमाणपत्र र अस्पतालमा उपचार गराएको सम्पूर्ण कागजातसहित यस कार्यालयमा ७ दिनभित्रमा सम्पर्क राख्नुहुन अनुरोध छ।'
यो अनुरोध घाइतेहरूको विवरण संकलन गरी उनीहरूको अवस्था अनुसार वर्गीकरण गर्नका लागि गरिएको हो। यसबाट घाइतेहरूलाई आवश्यक सहयोग तथा सुविधा उपलब्ध गराउन सहज हुने अपेक्षा गरिएको छ।
