अर्घाखाँची । अर्घाखाँची जिल्ला प्रहरी कार्यालयका प्रमुख प्रहरी नायब उपरीक्षक (डिएसपी) दिवसबहादुर जिसीले जिल्लामा शान्ति सुरक्षा कायम गर्न नागरिक, व्यवसायी तथा सरोकारवालाहरूको हातेमालो अपरिहार्य रहेको बताएका छन्। जिल्ला प्रहरी कार्यालय अर्घाखाँचीले आयोजना गरेको विशेष अन्तरक्रिया कार्यक्रममा बैंक तथा वित्तीय संस्थाका प्रमुख, यातायात व्यवसायी, अगुवा नागरिकलगायत विभिन्न क्षेत्रका प्रतिनिधिसँग छलफल गर्दै डिएसपी जिसीले प्रहरी जनताको सेवामा समर्पित भएर काम गर्ने प्रतिबद्धता व्यक्त गरे ।
उनले अर्घाखाँचीका जनताले उठाएका जायज माग तथा विषयलाई सम्बोधन गर्न प्रहरी तत्पर रहेको बताए। उनले देखिने चोरी, डकैती, तस्करी, गैरकानुनी काम तथा आपराधिक गतिविधिलाई नियन्त्रणमा लिन प्रहरीले कडा कदम चाल्ने र कानुन हातमा लिएर समाजलाई आतंकित बनाउन खोज्नेलाई कानुनी कठघरामा उभ्याइने दृढता व्यक्त गरे ।
डिएसपी जिसीले नेपाल प्रहरीले आफ्नो कार्यशैलीलाई सुदृढ र प्रभावकारी बनाउन निरन्तर प्रयास गरिरहेको जानकारी दिए। उनले कानुन र जनताको पक्षमा अहोरात्र खटिने, नागरिकको सुरक्षालाई प्राथमिकतामा राख्ने र समाजलाई सुरक्षित बनाउन विशेष अभियान अघि बढाइएको उल्लेख गरे। "समाजका सबै क्षेत्र र व्यवसायीहरूको सहयोग बिना सुरक्षाको लक्ष्य हासिल गर्न कठिन हुन्छ। त्यसैले यसलाई साझा जिम्मेवारीका रूपमा लिनुपर्छ र प्रहरीसँग सहकार्य गर्नुपर्छ," उनले भने ।
जनचेतनाको कमीका कारण समाजमा अहिंसा, आपराधिक क्रियाकलाप तथा कानुनले निषेध गरेका गतिविधि हुने गरेको उल्लेख गर्दै उनले सचेत नागरिकको सक्रियता आवश्यक रहेको धारणा राखे। चाडपर्व नजिकिँदै गर्दा सुरक्षामा चुनौती बढ्ने भएकाले त्यसअनुरूप विशेष सुरक्षा योजना तयार पारिएको र यातायात तथा सडक सुरक्षामा विशेष ध्यान दिइएको उनले बताए। "प्रहरी जनताको सेवामा समर्पित भएर काम गर्ने प्रतिबद्धता राख्छौ । अर्घाखाँचीका जनताले उठाएका जायज माग तथा विषयलाई सम्बोधन गर्न प्रहरी तत्पर छ," उनले भने।
