बुटवल । लुम्बिनी प्रदेशका मुख्यमन्त्री चेतनारायण आचार्यले रुपन्देहीको तिलोत्तमामा सुरु भएको दोस्रो व्यापार महोत्सवको उद्घाटन गरेका छन् । महोत्सवको उद्घाटन गर्दै मुख्यमन्त्री आचार्यले लुम्बिनी प्रदेशमा उद्योग तथा व्यापार व्यवसायको वातावरण सरकारले बनाउने हुँदा निर्धक्क भएर लगानी गर्न आमन्त्रण गरे ।
पछिल्लो समय आर्थिक अवस्था सुधार हुन थालेको, उद्योग, व्यवसायको क्षेत्रमा सकारात्मक प्रभावहरु देखिन थालेकोमा खुसी व्यक्त गर्दै मुख्यमन्त्री आचार्यले तीन तहका सरकारले लगानीमैत्री वातावरण बनाउने नीति अवलम्बन गरेकाले ढुक्क भएर लगानी गर्न उद्योगी, व्यवसायीहरुलाई आग्रह गरे ।
लुम्बिनी प्रदेशको विकास र समृद्धिको निम्ति प्रदेशमा उद्योग, व्यवसायको विकास हुन जरुरी रहेको उनले बताए । ‘राज्यले वातावरण बनाउँछ । लगानीकर्ताहरुले निर्धक्क भएर लगानी गर्नुस्। लुम्बिनी प्रदेशमा हामी आमन्त्रण गर्दछौं’उनले भने–‘सरकारले व्यवसायीहरुको संरक्षण र सम्बर्द्धन गर्छ । उद्योग, पर्यटन, कृषि, पूर्वाधार विकास हाम्रा प्राथमिकता हुन् ।’
एक अर्को प्रसंगमा मुख्यमन्त्री आचार्यले आफूले थालेका कामप्रति दृढ विश्वास नहुँदा समाजमा केही विचलन देखिएको उल्लेख गरे । ‘अहिले आफूले गरेका कामप्रति विश्वास गर्न नसक्दा विचलन देखियो’उनले भने–‘पुर्खाहरुले गरेका व्यवसाय वैज्ञानिक थिए । तर, अहिले ती व्यवसाय छोड्दै जाँदा समस्याहरु आएका छन् । पुर्खाले गरेका व्यवसायलाई निरन्तरता दिन सक्नुपर्छ ’
तिलोत्तमा लुम्बिनीको मात्रै नभइ देशकै उदाउँदो र नमूना शहरको रुपमा परिचित हुनु गौरवको विषय भएको उनको भनाइ छ । महोत्सवको आयोजक संस्था तिलोत्तमा व्यापार संघका अध्यक्ष नेत्र प्रसाद न्यौपानेको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा महोत्सवको उद्घाटन गरिएको थियो । महोत्सवमा विभिन्न क्षेत्रका तीन सय स्टल रहेका छन् ।
