मर्चवार । रुपन्देहीको मर्चवार क्षेत्र अन्तर्गत कोटहीमाई गाउँपालिका–६ स्थित मर्चवारी मन्दिरमा राष्ट्रिय स्वतन्त्र पार्टी (रास्वपा) ले निःशुल्क स्वास्थ्य शिविर गरेको छ ।
पार्टीको अभियान तथा प्रचार प्रसार, स्वास्थ्य तथा जनसंख्या विभाग लुम्बिनी प्रदेश तथा रास्वपा रुपन्देहीको आयोजनामा शनिबार शिविर भएको पार्टीको सिद्धार्थनगरका निवर्तमान सभापति सुमन न्यौपानेले बताए ।
शिविरमा स्त्रीरोग, बालरोग, हाडर्जोनी, छालारोग, जनरल फिजिसियन सेवा, फिजियोथेरापी, स्वास्थ्य सम्बन्धी परामर्श तथा निःशुल्क औषधी वितरण गरिएको रास्वपा अभियान तथा प्रचार प्रसार विभाग लुम्बिनी प्रदेश प्रमुख महेन्द्र प्रसाद उपाध्यायले बताए ।
आम जनतामा स्वास्थ्यको पहुँच नाराका साथ शिविर सञ्चालन गरिएको रास्वपा रुपन्देही जिल्ला सभापति डा. बुद्धि प्रसाद शर्माले बताए ।शिविरमा ७१३ जना स्थानीयबासीले स्वास्थ्य परीक्षण गराएको रास्वपाको स्वास्थ्य तथा जनसंख्या विभाग लुम्बिनी प्रदेश प्रमुख डा. योगेन्द्र अग्रहरीले जानकारी दिए ।
