भैरहवा । जिल्ला प्रहरी कार्यालय, रुपन्देही र मातहतका प्रहरी इकाईहरूले जिल्लाका विभिन्न स्थानमा गरेको विशेष चेकजाँचका क्रममा करिब ७ लाख ३८ हजार ६ सय २० रुपैयाँ बराबरको अवैध सामान बरामद गरेको छ । भदौ १ र २ गते गरिएको कारबाहीमा भन्सार छली चोरी पैठारी गरिएका विभिन्न सामग्री र त्यसमा प्रयोग भएका मोटरसाइकलहरू नियन्त्रणमा लिइएको हो ।
जिल्ला प्रहरी कार्यालयका सूचना अधिकारी, डीएसपी सुरज कार्कीका अनुसार बरामद गरिएका सबै सामान आवश्यक कारबाहीका लागि भैरहवा भन्सार कार्यालय र पशु क्वारेन्टाइन कार्यालय, बेलहियामा बुझाइएको छ ।
प्रहरीले सार्वजनिक गरेको विवरण अनुसार, जिल्ला प्रहरी कार्यालय, रुपन्देहीको टोलीले सिद्धार्थनगर नगरपालिका–२ शंकरपुर र मायादेवी गाउँपालिका–५ गोनाहाबाट तीनवटा मोटरसाइकलमा ल्याउँदै गरेको अवस्थामा लेडिज साडी, कुर्ता, भित्री बस्त्र, कपडाको झोला, टायल, नरिवल र जाइफल गरी कुल ३ लाख ३९ हजार ५ सय रुपैयाँ बराबरको सामान बरामद गरेको छ ।
त्यसैगरी, वडा प्रहरी कार्यालय भैरहवाको टोलीले सिद्धार्थनगर नगरपालिका–८ बुद्धचोकबाट लेडिज चप्पल, ताल्चा, लेडिज भित्री बस्त्र र तरकारी गरी जम्मा १ लाख ६० हजार ५ सय रुपैयाँ बराबरको अवैध सामान नियन्त्रणमा लिएको हो ।
यस्तै, प्रहरी चौकी कालिदहको टोलीले लुम्बिनी सांस्कृतिक नगरपालिका–१ नन्दनगरमा एउटा मोटरसाइकलमा ओसारपसार भइरहेको ४८ वटा ब्रोइलर कुखुरा बरामद गरेको छ, जसको मूल्य मोटरसाइकलसहित ८० हजार रुपैयाँ अनुमान गरिएको छ ।
यसैगरी, प्रहरी चौकी मैनिहवाको टोलीले रोहिणी गाउँपालिका–७ सेमरामा बेवारिसे अवस्थामा रहेको एयर कन्डिसनमा प्रयोग हुने १ लाख ५८ हजार ६ सय २० रुपैयाँ मूल्य बराबरको कम्प्रेसर फेला पारी बरामद गरेको डीएसपी कार्कीले जानकारी दिनुभयो ।
