अर्घाखाँची । अर्घाखाँचीको सन्धिखर्क नगरपालिकाले नगरभित्रका किशोरीहरूलाई पाठेघरको मुखको क्यान्सरविरुद्धको एच.पी.भी.खोप लगाउने तयारी स्वरूप सरोकारवालाहरूसँग अभिमुखीकरण कार्यक्रम सम्पन्न गरेको छ । नगर खोप समन्वय समितिका अध्यक्ष एवं नगर प्रमुख कृष्णप्रसाद श्रेष्ठको अध्यक्षतामा भएको उक्त कार्यक्रममा आगामी माघ २७ गतेदेखि फागुन २ गतेसम्म विद्यालय केन्द्रित खोप अभियान सञ्चालन गरिने जानकारी दिइयो ।
नगर प्रमुख श्रेष्ठले किशोरीहरूको स्वास्थ्यसँग जोडिएको यो संवेदनशील अभियानलाई सफल बनाउन सबै पक्षले सक्रिय भूमिका खेल्नुपर्नेमा जोड दिनुभयो । कार्यक्रममा स्वास्थ्य संयोजक पूर्ण पराजुलीले नगरभित्रका संस्थागत र सामुदायिक विद्यालयका गरी करिब ३९७ जना किशोरीलाई खोप लगाउने लक्ष्य रहेको जानकारी गराउनुभयो भने कार्यक्रमको सञ्चालन जनस्वास्थ्य निरीक्षक प्रकाश परियारले गर्नुभएको थियो ।
