भैरहवा । बाख्रीको मासुलाई खसीको मासु भनी बिक्री वितरण गरी उपभोक्तालाई ठगी गरेको आरोपमा प्रहरीले सिद्धार्थनगर नगरपालिका–८ बाट एक जनालाई पक्राउ गरेको छ। पक्राउ पर्नेमा स्थानीय आजम मासु पसलका सञ्चालक ३९ वर्षीय आजम कुरेसी रहेका छन्।
विशेष सूचनाका आधारमा वडा प्रहरी कार्यालय भैरहवाबाट खटिएको टोलीले पसलमा छापा मार्ने क्रममा बाख्रीको मासुलाई खसीको भन्दै बेचिरहेको अवस्थामा मासुसहित कुरेसीलाई नियन्त्रणमा लिएको हो । पक्राउ परेका कुरेसीविरुद्ध कालोबजारी सम्बन्धी कसुरमा मुद्दा चलाउन जिल्ला प्रशासन कार्यालय रुपन्देहीबाट पाँच दिनको म्याद थप गरी आवश्यक अनुसन्धान अघि बढाइएको रुपन्देहीका प्रहरी नायव उपरीक्षक एवं सूचना अधिकारी कृष्ण कुमार चन्दले जानकारी दिनुभयो।
