भैरहवा । भैरहवा भन्सार कार्यालय, रुपन्देहीले चालू आर्थिक वर्ष २०८१/८२ को पहिलो ६ महिनामा ४६ अर्ब २ करोड ९६ लाख रुपैयाँ राजस्व संकलन गरेको छ । गत वर्षको सोही अवधिको तुलनामा भन्सार राजस्व संकलन बढी हो । ‘हामीले भन्सार विभागले दिएको लक्ष्य भेटाउन सकेका छैनौं’प्रमुख भन्सार अधिकृत राम प्रसाद रेग्मीले भने, ‘तर निराश हुने गरी राजस्व संकलन घटेको छैन ।’
रेग्मीका अनुसार गत वर्ष यही अवधिमा ३९ अर्व १४ करोड राजस्व संकलन भएको थियो । जुन लक्ष्यको ३० दशमलव ६२ प्रतिशत हो । तर, अहिले चालू आर्थिक वर्ष लक्ष्यको ४२ प्रतिशत बढी राजस्व संकलन भएको छ । यस वर्ष लक्ष्य पनि बढी छ । कार्यालयले साउनदेखि पुससम्मको राजस्व संकलन औसतमा ८० प्रतिशत माथि छ ।
कार्यालयले साउनमा ८३ दशमलव ५३ प्रतिशत, भदौमा ९० दशमलव ५ प्रतिशत, असोजमा १ सय दशमलव ३९ प्रतिशत, कार्तिकमा ८३ दशमलव १७ , मंसिरमा ८२ दशमलव १७ र पुसमा ८० दशमलव ६२ प्रतिशत राजस्व संकलन गरेको हो ।कार्यालयबाट गत तीन वर्षदेखि लगातार भन्सार राजस्व संकलन घटेकोमा चालु आर्थिक वर्षको सुरुवातदेखि नै सुधार भइरहेको छ । ‘शतप्रतिशत राजस्व संकलन नभए पनि औसतमा ८० प्रतिशतमाथि छ र यो सन्तोषजनक हो,’उनले भने ।
‘भन्सार विभागले दिएको लक्ष्यअनुसार संकलन गर्न नसकेको हो, तर विगतका वर्षभन्दा सुधार गरेका छौंं’उनले भने, ‘समग्र देशको भन्सार राजस्व संकलनको लक्ष्यभन्दा हामीले सन्तोषजनक संकलन गरेका छौं । ’भैरहवा भन्सार कार्यालयलाई भन्सार विभागले आर्थिक वर्ष २०८१/८२ का लागि १ खर्ब ९ अर्व ३३ करोड रुपैयाँ राजस्व संकलनको लक्ष्य दिएको छ । कार्यालयले गत साउनदेखि ८० प्रतिशतमाथि नै राजस्व संकलन गर्दै आइरहेको छ ।
२०७८ पुस ५ बाट नेपाल राष्ट्र बैंकले १८ वटा शिर्षकका बिलासिताका विभिन्न वस्तुहरुको आयातमा अनिवार्य प्रतितपत्र (एलसी) खोलेर शतप्रतिशत र दुईवटा शिर्षकमा ५० प्रतिशत नगद मार्जिन राख्नुपर्ने व्यवस्था गरेसँगै वस्तु आयातमा कमी हुँदै आउँदा राजस्व संकलन खुम्चिन गएको थियो । कार्यालयले आर्थिक वर्ष २०८०/८१ मा लक्ष्यको ६३ दशमलव २४ प्रतिशत संकलन गरेको थियो ।
भन्सार कार्यालयका अनुसार बेलहिया नाकाबाट भित्रिने मुख्य १० वस्तुमा मोटरसाइकल, जीप, कार र भ्यान, पेट्रोल, मोबाइल, टेलिफोन, इलेक्ट्रिक कार, जीप, भ्यान, एमएस विलेट, टायल, डिजेल, मार्बल स्ल्याब र एलपी ग्यास रहेको छ ।
