परासी । पश्चिम नवलपरासीको पाल्हीनन्दन गाउँपालिकाले सार्वजनिक सुनुवाई कार्यक्रम सम्पन्न गरेको छ । गाउँपालिकाको वडा नम्बर–२ को वडा कार्यालयले आर्थिक बर्ष २०८०।०८१ मा भएको विकास निर्माण र सेवा प्रवाहको अवस्थाबारे वडास्तरीय सार्वजनिक सुनुवाई गरिएको हो ।
वडा नं. २ का अध्यक्ष जगदिश प्रसाद गुप्ताको अध्यक्षतामा सार्वजनिक सुनुवाई गरिएको छ । सो अवसरमा वडावासीले थुप्रै प्रश्नहरु उठाएका छन् । वडावासीले शुद्ध खानेपानी, हरपुर चोकमा प्रतिक्षालय, बजार क्षेत्रमा सार्वजनिक शौचालय, विद्युतिकरणका लागि पोल, सिंचाईं, मलखाद, वीउबिजनको सहज पहुँच हुन नसकेकोले त्यस तर्फ ध्यान दिन आग्रह गरेका छन् ।
सार्वजनिक सुनुवाई कार्यक्रममा वडाबासी गुलाम हुेसेन पठानले वडाका कर्मचारीहरुले मुस्कान सहितको सेवा दिन नसकेको गुनासो गर्नुभयो । कार्यक्रममा वडावासीले उठाएका कुराहरुलाई वडा अध्यक्ष जगदिश प्रसाद गुप्ताले सम्बोधन गर्नु भएको थियो । अध्यक्ष गुप्ताले गएको १० महिनामा वडाबाट भएगरेका कामको जानकारी दिनुभयो ।
सार्वजनिक सुनुवाई कार्यक्रममा वडा सचिव गोविन्द प्रसाद गुप्ता, वडा सदस्य रामसजिवन गुप्ता लगायतले बोल्नु भएको थियो भने कार्यक्रमको सहजिकण सामुदायिक रेडियो परासी ९०.२ मेगाहर्जले गरेको हो ।
