भैरहवा । जिल्ला प्रहरी कार्यालय, रुपन्देहीले मोटरसाइकल चोरीमा संलग्न रहेको आरोपमा तीन जनालाई पक्राउ गरेको छ। सिद्धार्थनगर नगरपालिका-५ स्थित पवन मिष्ठान्न भण्डार अगाडि पार्किङ गरी राखेको लु ५६ प ८०३२ नम्बरको पल्सर मोटरसाइकल चोरी भएको थियो।
मोटरसाइकलधनी नवराज यादवले दिएको उजुरीको आधारमा अनुसन्धान अगाडि बढाएको प्रहरीले रोहिणी गाउँपालिका-२ बाट चोरीमा संलग्न व्यक्तिहरूलाई पक्राउ गरेको हो। रुपन्देहीका प्रहरी प्रमुख, प्रहरी उपरीक्षक (एसपी) प्रदीपबहादुर क्षेत्रीका अनुसार चोरी भएको मोटरसाइकलसहित उनीहरूलाई नियन्त्रणमा लिइएको हो।
पक्राउ पर्नेहरूमा रोहिणी गाउँपालिका-२ का २५ वर्षीय अमरनाथ गुप्ता, ओमसतिया गाउँपालिका-५ का २० वर्षीय कलिम अन्सारी र रोहिणी गाउँपालिका-३ का १८ वर्षीय राम सतिश गुप्ता रहेका छन्।प्रहरीले उनीहरूलाई नियन्त्रणमा लिई थप अनुसन्धान कार्य अगाडि बढाएको जनाएको छ।
