नवलपुर । पूर्वी नवलपरासीको गैंडाकोट–१ स्थित ब्रिटिस क्याम्प अगाडि नारायणी नदीको बीच भागमा फसेका दुई जना पुरुषको सशस्त्र प्रहरीले सकुशल उद्धार गरेको छ भने माछा मार्ने क्रममा नदीले बगाएर एक जना बेपत्ता भएका छन्। माछा मार्नका लागि नारायणी नदी तर्ने क्रममा लमजुङ घर भई भरतपुर महानगरपालिका–११ लीलाचोक बस्ने ४७/४८ वर्षका हरिनारायण श्रेष्ठ नदीको तीव्र बहावका कारण बगेर बेपत्ता हुनुभएको हो। सोही क्रममा उहाँसँगै गएका अन्य दुई जना नदीको बीच भागमा फसेका थिए।
घटनाको जानकारी प्राप्त हुनासाथ सशस्त्र प्रहरी बल, नेपाल नं. ३१ गुल्म हे.क्वा. पूर्वी नवलपरासीबाट सशस्त्र प्रहरी निरीक्षक राम चन्द्र खड्काको कमाण्डमा ९ जनाको टोली आवश्यक उद्धार सामग्रीसहित परिचालन भएको थियो। टोलीले र्याफ्ट बोट को प्रयोग गरी नदीको बीचमा फसेका व्यक्तिहरूको सकुशल उद्धार गरेको हो।
उद्धार गरिएकाहरूमा चितवन भरतपुर महानगरपालिका–१० बस्ने ३९ वर्षीय राजकुमार बि.क. र तनहुँ भानु–५ भन्सार घर भई हाल गैंडाकोट–१ धारापानी बस्ने २९ वर्षीय सुदीप दर्लामी मगर रहेका छन्। उद्धार गरिएका दुवै जनालाई ईलाका प्रहरी कार्यालय गैंडाकोटलाई बुझाइएको छ भने बेपत्ता श्रेष्ठको खोजी कार्य जारी रहेको प्रहरीले जनाएको छ।
