भैरहवा । रुपन्देहीको सिद्धार्थनगर नगरपलिका (भैरहवा) ले छाडा चौपाय व्यवस्थापनमा सक्रियता देखाएको छ । अघिल्लो वर्ष पश्चिम नवलपरासीको एक गौशालाको समन्वयमा छाडा चौपाय व्यवस्थापन गरेको नगरपालिकाले यसपटक कपिलवस्तुको बाणगंगा नगरपालिकाको समन्वयमा व्यवस्थापन सुरु गरेको हो ।
यो वर्ष माघ ५ गते शनिबार (हिजो) देखि छाडा चौपाय व्यवस्थापन अभियान सुरु गरिएको र पहिलो दिन ५० भन्दा बढी छाडा चौपाय बजार क्षेत्रबाट नियन्त्रणमा लिइएको सिद्धार्थनगर नगरपालिकाका प्रमुख प्रशासकीय अधिकृत जनक थापाले जानकारी दिए । उनका अनुसार ती गाईगोरु कसैले आफ्नो भनी दावी गर्न आएमा न्यूनतम ७ हजार रुपैयाँ जरिवाना गराएर दिइने र अन्यथा व्यवस्थापनका लागि कपिलवस्तु लैजाने तयारी भइरहेको छ ।
‘छाडा चौपायका कारण नगरमा सवारी दुर्घटना बढेको छ, ’उनले भने, खुल्ला सीमा र छिमेकी पालिकाबाट यहाँ चौपाय भित्रिरहेका छन् ।’ सिद्धार्थनगर नगरपालिकाको अभियानमा बाणगंगा नगरपालिकाले सहयोग गरेको थापाले बताए ।नगर क्षेत्रभित्र थारा, बेत बसेका वा दूध दिन छोडेका र बिरामी गाईगोरु बेवारिसे अवस्थामा छोडिदिने चलन बढेको र यसले गर्दा सडकमा छाडा गाईवस्तु बढ्न थालेपछि व्यवस्थापन सुरु गरिएको सिद्धार्थनगर नगरपालिकाका प्रमुख (मेयर) इश्तियाक अहमद खाँले जानकारी दिए ।
शहर बजारका पसले, सडकमा गुड्ने गाडीदेखि बस्तीका किसानसम्मलाई छाडा चौपायले हैरान बनाउन थालिएपछि व्यवस्थापन सुरु गरिएको उनले बताए । छाडा चौपाय व्यवस्थापनको लागि नगरपालिकाले वडा नम्बर ११ मा आफ्नै गौशाला निर्माण गर्न लागेको र निर्माणसम्पन्न नहुञ्जेल गौशाला र चरण क्षेत्र भएका पालिकाहरुसँगं समन्वय गरेर व्यवस्थापन गरिने खाँले जानकारी दिए ।
सिद्धार्थनगर नगरपालिकाका प्रवक्ता एवं छाडा चौपाय व्यवस्थापन संयोजक मुक्तिनाथ यादव (भोला) ले नगरमा बढ्दो सवारी दुर्घटना न्यूनीकरणका लागि छाडा चौपाय व्यवस्थापन सुरु गरिएको बताए । उनले छाडाचौपायको सुरक्षित साथ व्यवस्थापन सुरु गरिएको र यसलाई नियमित गरिने जानकारी दिए ।
छाडा चौपाय व्यवस्थापन सदस्य तथा सिद्धार्थनगर नगरपालिका–१० का वडाअध्यक्ष सुर्जमन यादवले छाडा चौपायका कारण सवारी दुर्घटना बढेको र किसानले खेतबारीमा लगाएको अन्नबाली समेत नोक्सान हुने गरेको बताए ।
