भैरहवा । जिल्ला प्रहरी कार्यालय रुपन्देहीले पछिल्लो तीन दिनमा जिल्लाका विभिन्न स्थानबाट भन्सार छली गरी ल्याइएका १७ लाख ४१ हजार ६४५ रुपैयाँ बराबरको अवैध सामान बरामद गरेको छ । प्रहरीले साउन २८, २९ र ३० गते सञ्चालन गरेको विशेष चेकजाँच अभियानका क्रममा उक्त मूल्य बराबरको सामान नियन्त्रणमा लिएको हो ।
बरामद गरिएका सामानहरूमा ठूलो परिमाणमा लत्ताकपडा, कुखुरा, किराना तथा खाद्य सामग्री, सवारीसाधन र अन्य विविध वस्तुहरू रहेका छन् । प्रहरीले लेडिज सुट, साडी, कुर्ता सुरुवाल जस्ता कपडाहरू, बोइलर कुखुरा, पाउडर दूध, मिठाई, मटर, पानी तान्ने मोटर, गमला, प्लाइ बोर्ड र खेलौना जस्ता सामग्री नियन्त्रणमा लिएको हो ।
अवैध सामान ओसारपसारमा प्रयोग भएका बस र मोटरसाइकलसहित केही चालक तथा संलग्न व्यक्तिहरूलाई पनि प्रहरीले पक्राउ गरेको छ । बरामद गरिएका सम्पूर्ण सामानहरू आवश्यक कारबाहीका लागि भैरहवा भन्सार कार्यालय र पशु क्वारेन्टाइन कार्यालय, बेलहियामा बुझाइएको प्रहरीले जनाएको छ ।
यस सम्बन्धमा रुपन्देहीका प्रहरी प्रमुख (एसपी) प्रदीप बहादुर क्षेत्रीले जिल्लामा कुनै पनि प्रकारको अवैध गतिविधि र अपराधलाई निरुत्साहित पारिने बताउनुभएको छ । उहाँले भन्नुभयो, "अवैध गतिविधि र अपराध गर्छु भन्ने नसोचे हुन्छ । प्रहरीले कुनै हालतमा छोड्दैन ।"प्रहरीको सक्रियता बढेसँगै अवैध चोरी पैठारी नियन्त्रणमा आएकोमा स्थानीय बासिन्दाले खुशी व्यक्त गरेका छन् ।
