भैरहवा । रुपन्देहीको मायादेवी गाउँपालिका–५ स्थित गुरुवनियामा प्रहरीले प्रतिरक्षामा गोली प्रहार गरी हतियार र लागुऔषध सहित एक जना भारतीय नागरिकलाई नियन्त्रणमा लिएको छ । भारततर्फबाट लागुऔषध ब्राउन सुगर र पेस्तोलसहित मोटरसाइकलमा आएका भारत उत्तर प्रदेशका अकबाल खानलाई पक्राउ गर्ने क्रममा प्रहरीले आत्मरक्षाका लागि गोली चलाएको हो ।
जिल्ला प्रहरी कार्यालय रुपन्देहीका सूचना अधिकारी एवं प्रहरी नायब उपरीक्षक (डीएसपी) कृष्ण कुमार चन्दका अनुसार प्रहरीको गोली लागेर खानको खुट्टामा चोट लागेको छ । उनको साथबाट एक थान पेस्तोल, गोली, लागुऔषध ब्राउन सुगर र भारतीय नम्बर प्लेटको मोटरसाइकल बरामद गरिएको छ । बरामद लागुऔषधको परिमाण यकिन हुन बाँकी रहेको छ । यसैगरी, उक्त घटनामा संलग्न रहेको आशंकामा प्रहरीले थप दुई जनालाई समेत नियन्त्रणमा लिएको डीएसपी चन्दले जानकारी दिनुभयो । घटनाका सम्बन्धमा प्रहरीले थप अनुसन्धान अघि बढाएको छ ।
