भैरहवा । भैरहवाका प्रतिष्ठित समाजसेवी स्वर्गीय निधान चन्द्र श्रेष्ठको स्मृतिमा २ जना जेहनदार विद्यार्थीहरूलाई पुरस्कार बितरण गरिएको छ । सोमबार एक कार्यक्रमको आयोजना गरि भैरहवा मर्निङ्ग वाक ग्रुपले पुरस्कार प्रदान गरेको हो ।
भैरहवा नमूना माध्यमिक विद्यालयमा अध्ययनरत मुस्कान यादव र बुद्ध मोक्तान जनही नगद ८ हजार रुपैयाँ सहित पुरस्कृत भएका हुन् । २००७ साल फागुन ७ गते जन्मिएका निधान चन्द्र श्रेष्ठको स्मृतिमा उनकै जन्मदिवसको अवसर पारेर भैरहवा मर्निङ्ग वाक ग्रुपले पुरस्कार प्रदान गर्दै आएको छ ।
श्रेष्ठको स्मृतिमा २ लाख ५० हजार रुपैयाँको अक्षयकोष स्थापना गरि त्यसैको ब्याजबाट प्रत्येक वर्ष १ जना जेहनदार छात्र र १ जना जेहनदार छात्रालाई पुरस्कार प्रदान गर्दै आएको ग्रुपका अध्यक्ष विजय गोविन्द श्रेष्ठले बताए । विगत २ वर्षहरूमा एक जनालाई मात्र पुरस्कृत गर्दै आएकोमा यस बर्ष देखि २ जनालाई पुरस्कार दिने निर्णय भएको उनले बताए । सामुदायिक विद्यालयको छनौट गोलाप्रथाबाट गरिएको र छानिएको विद्यालयको सिफारिसमा पुरस्कार प्रदान गर्ने गरिएको उनले बताए ।
पुरस्कार समर्पण कार्यक्रममा वक्ताहरूले स्वर्गीय निधान चन्द्रको योगदान बारे चर्चा गरेको थिए । मेलम्चीमा २००७ साल फागुन ७ गते जन्मिएका श्रेष्ठको पाल्पामा पालनपोषण भएपनि उनको कर्मथलो भैरहवा रहेको थियो । भैरहवाका कयौँ सामाजिक संस्थाहरूमा संलग्न उनी यस क्षेत्रकै प्रतिष्ठित व्यवसायी एवम् समाजसेवीको रुपमा रहेका थिए । उनको २०७५ भदौ २२ गते निधन भएको थियो ।
भैरहवा मर्निङ्ग वाक ग्रुपका अध्यक्ष विजय गोविन्द श्रेष्ठको अध्यक्षता, वडा नम्बर ५ का वडा अध्यक्ष पुरन प्रसाद श्रेष्ठको प्रमुख आतिथ्यमामा सम्पन्न पुरस्कार समर्पण कार्यक्रममा भैरहवा नमूना विद्यालय व्यवस्थापन समितिका अध्यक्ष आनन्द प्रसाद गुप्ता, प्राचार्य चुन्न प्रसाद पाण्डे, पूर्व अध्यक्ष नारायण प्रसाद अग्रवाल, वडा सदस्य सरस्वती श्रेष्ठले बोलेका थिए । कार्यक्रम ग्रुपका उपाध्यक्ष राजु नारायण श्रेष्ठको स्वागत एवम् सचिव वनमाली निराकारको सञ्चालनमा सम्पन्न भएको थियो ।
