नवलपरासी । ‘लैंगिक हिंसाको अन्त्यको सुनिश्चितता : महिला र बालबालिकामा लगानीको ऐक्यवद्धता’ भन्ने नाराका साथ लैंगिक हिंसाविरुद्धको १६ दिने अभियान पाल्हीनन्दनमा पनि सुरू गरिएको छ ।
शनिवार नवलपरासीको पाल्हीनन्दन गाउँपालिकाले अभियानको सुरुवात गरेको हो । कार्यक्रमको उद्घाटन गर्दै पाल्हीनन्दन गाउँपालिकाका अध्यक्ष बैजु प्रसाद गुप्ता (दिपक) ले पालिकामा लैंगिकमैत्री वातावरण बनाउन आफू लागिपरेको बताए ।
त्यस्तै, सोही अवसरमा बोल्दै गाउँपालिकाकी उपाध्यक्ष फातिमा खातुन अन्सारीले लैंगिक हिंसाविरुद्ध सबै सरोकारवालाको आवाज एक हुनुपर्ने बताइन ।
उनले लैंगिक हिंसा समाजको ठुलो समस्याको रुपमा रहेको भन्दै सोच परिर्वतनसँगै यसको अन्त्यका लागि सबै पक्ष लाग्नुपर्नेमा जोड दिइन् । कार्यक्रममा हिंसामुक्त देश वनाउन नेपालको नक्सामा १८५ वटा पालामा दीप प्रज्जवलन गरिएको थियो ।
