नवलपरासी । नवलपरासीको पाल्हीनन्दन गाउँपालिका-२ हरपुरमा मोटरसाइकल दुर्घटना हुँदा चालकको मृत्यु भएको छ भने पछाडि सवार दुई जना घाइते भएका छन् । मृत्यु हुनेमा भारतको कुशीनगर जिल्ला, रामकोला गाउँका २५ वर्षीय विजय चौहान रहेका छन् । दुर्घटनामा गम्भीर घाइते भएका चौहानको भैरहवास्थित सिद्धार्थ सिटी अस्पतालमा उपचारका क्रममा मृत्यु भएको प्रहरीले जनाएको छ ।
दुर्घटनामा परी मोटरसाइकलको पछाडि सवार भारत घर भएका २३ वर्षीय सतिस कुमार चमार र रुपन्देहीको बुटवल उपमहानगरपालिका-३ बस्ने ३६ वर्षीय कमल राना घाइते भएका छन् । उनीहरू दुवै जनाको सोही अस्पतालमा उपचार भइरहेको छ । भारतीय नम्बर प्लेटको युपी ५७ बिपी ४१६२ नम्बरको मोटरसाइकल अनियन्त्रित भई पल्टिँदा सो दुर्घटना भएको हो । घटनाको सम्बन्धमा आवश्यक थप अनुसन्धान भइरहेको प्रहरीले जनाएको छ ।
