भैरहवा । ६ महिनाअघि हराएकी कास्कीकी एक ९ वर्षीय बालिकाको माइती नेपाल भैरहवाले भारतबाट उद्धार गरी परिवारको जिम्मा लगाएको छ । कास्कीको अन्नपूर्ण गाउँपालिका–८ की ती बालिका आफ्नो बुवासँगै भारतको चण्डीगढ गएकोमा ६ महिनाअघि हरियाणाबाट हराएकी थिइन् । बुवाको मानसिक स्वास्थ्य अवस्था ठीक नभएका कारण उनी हराएको बताइएको छ ।
माइती नेपाल भैरहवाकी कार्यक्रम संयोजक माया क्षेत्रीले भारतका विभिन्न संघ–संस्था र दूतावाससँगको समन्वयमा कानूनी प्रक्रिया पूरा गरी बालिकाको उद्धार गरिएको जानकारी दिनुभयो । उद्धारपछि बालिकालाई एक हप्तासम्म भैरहवास्थित आवधिक गृहमा राखिएको थियो ।
परिवारसँग सम्पर्क भएपछि अन्नपूर्ण गाउँपालिका वडा कार्यालयको सिफारिसमा बालिकालाई उनका काकाको जिम्मा लगाइएको हो । घरमा बुबाआमा नभएकाले बाजेबज्यैको आग्रहमा उनलाई घर पठाइएको माइती नेपालले जनाएको छ ।
