भैरहवा । राष्ट्रिय प्रजातन्त्र पार्टी (राप्रपा) ले आफ्नो भागमा परेको समानुपातिकतर्फका चार जना उम्मेदवारको नाम टुंगो लगाएको छ। आइतबार बसेको पार्टीको केन्द्रीय कार्यसम्पादन समितिको बैठकले समानुपातिक सांसदका लागि अन्तिम नामावली तय गरेको हो।
पार्टीका प्रवक्ता मोहनकुमार श्रेष्ठले दिएको जानकारी अनुसार राप्रपाले पाएको चार सिटमा विभिन्न समावेशी समूहलाई समेटेर नाम टुंग्याइएको छ। जसअन्तर्गत खस आर्य पुरुषतर्फबाट भरत गिरी र मुस्लिम पुरुषतर्फबाट ताहिर अलीलाई चयन गरिएको छ। त्यसैगरी, महिलातर्फ खस आर्य कोटाबाट खुस्बु ओली र आदिवासी जनजाति महिलाबाट सरस्वती लामालाई समानुपातिक उम्मेदवारका रुपमा छनोट गरिएको छ। मुस्लिम पुरुष कोटाबाट समानुपातिकमा पर्न सफल ताहिर अली रुपन्देही निवासी हुनुहुन्छ। उहाँ हाल राष्ट्रिय प्रजातन्त्र पार्टीको सहायक महामन्त्रीको जिम्मेवारीमा समेत सक्रिय रहनुभएको छ।
