अर्घाखाँची । अर्घाखाँची प्रहरीले आसन्न निर्वाचनलाई मध्यनजर गर्दै आपराधिक गतिविधि नियन्त्रणका लागि सक्रियता बढाएको छ । जिल्ला प्रहरी कार्यालयका अनुसार आपराधिक पृष्ठभूमिका व्यक्ति तथा समूहले अशान्ति सिर्जना गर्न सक्ने सम्भावनालाई दृष्टिगत गर्दै निगरानी बढाइएको हो ।
जिल्ला प्रहरी कार्यालय सन्धिखर्कमा आयोजित पत्रकार भेटघाटमा प्रहरी नायब उपरीक्षक (डीएसपी) दिवसबहादुर जिसीले अर्घाखाँचीको भूमिकास्थान नगरपालिका-४ कल्लेरीमा एक आमाले आफ्नै चार वर्षीया छोरीको खुर्पा प्रहार गरी हत्या गरेको जानकारी दिए । मानसिक स्वास्थ्यसम्बन्धी समस्याको उपचारमा रहेकी ३१ वर्षीया ती आमालाई प्रहरीले नियन्त्रणमा लिई अनुसन्धान गरिरहेको छ ।
डीएसपी जिसीका अनुसार कात्तिक महिनामा मात्रै जिल्लामा ११ जनाको मृत्यु भएको छ, जसमध्ये ७ जनाले झुण्डिएर, २ जनाले सवारी दुर्घटनामा, १ जनाले आफैंले घाँटी रेटेर र १ जनाले आफ्नै छोरीको हत्या गरेर ज्यान गुमाएका छन् ।
यस अवधिमा जिल्ला प्रहरी कार्यालयमा कर्तव्य ज्यान, बहुविवाह, कुटपिट, सवारी ज्यान, हातहतियार खरखजना लगायतका २० वटा मुद्दा दर्ता भएका छन्, जसमध्ये ६ वटा फछ्र्योट भइसकेका छन् भने १४ वटा मुद्दा प्रक्रियामा छन् । ट्राफिक नियम उल्लंघन गर्ने सवारीसाधनबाट चेकजाँचका क्रममा २ लाख रुपैयाँभन्दा बढी राजस्व संकलन भएको पनि डीएसपी जिसीले बताए ।
