अर्घाखाँची । शितगंगा नगरपालिकाले नागरिकलाई स्थानीय सरकारको प्रत्याभूति गराउन वडा नं. ६ (जुकेना) र वडा नं. ७ (जलुके) मा दोस्रो पटक ‘एकीकृत घुम्ती शिविर’ सञ्चालन गरेको छ । विशेष गरी ग्रामीण क्षेत्रका नागरिकलाई घरदैलोमै सेवा पुर्याउने उद्देश्यले आयोजित यस शिविरमा स्वास्थ्य जाँच, कृषि परामर्श र नगरपालिकाका प्रशासनिक कामबारे जानकारी गराइएको प्रमुख प्रशासकीय अधिकृत कृष्णप्रसाद सापकोटाले जानकारी दिए ।
शिविरका क्रममा योजना अधिकृत नुमलाल खनालले उपभोक्ता समितिहरूलाई पारदर्शिता, उत्तरदायित्व, सुशासन, आर्थिक व्यवस्थापन र कानुनी प्रक्रियाबारे प्रशिक्षण दिएका थिए । उनले योजनाहरूको गुणस्तर कायम राख्दै सार्वजनिक सुनुवाइ र नियमित अडिट गर्नुपर्नेमा जोड दिए । कार्यक्रममा योजना शाखाकी लक्ष्मी भट्टराई र भूमकला भुसालले सहजीकरण गरेका थिए ।
शिविरमार्फत वडा नं. ६ र ७ मा करिब १६ वटा योजनाहरूको सम्झौता सम्पन्न भएको छ । ती योजनाहरू चैत मसान्तभित्र सम्पन्न गर्न उपभोक्ता समितिलाई निर्देशन दिइएको छ । वडा नं. ६ का अध्यक्ष ऋषिबहादुर घर्ती र वडा नं. ७ का अध्यक्ष देविराम घिमिरेले गाउँमै सहज सेवा उपलब्ध भएकोमा खुशी व्यक्त गरे ।
