भैरहवा । प्रधानमन्त्री कप राष्ट्रिय पुरुष एकदिवसीय क्रिकेट प्रतियोगितामा लुम्बिनी प्रदेशले चौथो जित हासिल गरेको छ । सोमबार दाङको लमही क्रिकेट मैदानमा भएको खेलमा लुम्बिनीले मधेश प्रदेशलाई ८३ रनले पराजित गरेको हो ।
जितका लागि लुम्बिनीले दिएको १५९ रनको लक्ष्य पछ्याएको मधेश प्रदेश २६.५ ओभरमा अलआउट हुँदै ७५ रनमा समेटियो । मधेशका लागि दीपेश दासले सर्वाधिक २३, हरीशंकर शाले १४ र रुपेश सिंहले ९ रन जोड्नु बाहेक अन्य खेलाडीले दोहोरो अंक रन जोड्न सकेनन् ।
लुम्बिनी प्रदेशका लागि रमेश कुर्मीले ४, विपर्सन केसीले ३ तथा देव खनाल र अजय चौहानले १-१ विकेट लिए । त्यसअघि पहिला ब्याटिङ गरेको लुम्बिनीले निर्धारित ५० ओभरमा सबै विकेट गुमाउँदै १५८ रन बनाएको थियो । लुम्बिनीका लागि आकाश त्रिपाठीले सर्वाधिक ७३ रनको योगदान दिदा कृष्ण कार्कीले ३३ र कप्तान देव खनालले १६ रन जोडेका थिए ।
मधेशका लागि विशाल पटेल र कमल गुप्ताले समान ३ तथा हरीशंकर शाह, प्रदीप पासवान र रञ्जित कमारले १-१ विकेट लिएका थिए । जितसँगै लुम्बिनीले पाँच खेलबाट ८ अंक जोडेको छ । पराजित मधेश प्रदेशले ४ खेलबाट २ अंक जोडेको छ ।
