भैरहवा । भैरहवामा जारी स्वर्गीय शेरबहादुर सेन्चुरी स्मृति अन्तरविद्यालय टी–२० क्रिकेट प्रतियोगिता अन्तर्गत बिहीबार भएका दुई खेलमा कुँवरवर्ती सेकेन्डरी स्कूल र होराइजन जीवीएस विजयी भएका छन् । कुँवरवर्तीले दीप बोर्डिङ स्कूललाई ४८ रनले हराउँदा होराइजनले बृहष्पति स्कूललाई ५ विकेले पराजित गरेको छ ।
भैरहवास्थित सिद्धार्थ क्रिकेट मैदानमा भएको पहिलो खेलमा टस जितेर ब्याटिङ गरेको कुँवरवर्तीले ६ विकेट गुमाएर १ सय ३२ रनको योगफल खडा गर्यो । उसका लागि अन्जित क्षेत्रीले ३७, उपेश सेनले ३४, कृष्ण विकले नटआउट २०, रोहन न्यौपानेले १३ र रवि कार्कीले ११ रनको योगदान गरे । बलिङमा दीप बोर्डिङका सचिन पुरीले ३, कृजन गौतमले २ तथा रियोन ढकालले १ विकेट लिए ।
जवाफी ब्याटिङ गरेको दीप बोर्डिङले ९ विकेटको नोक्सानीमा ८४ रन मात्रै बनायो । उसका लागि नजिम अलीले ३२ र रियोन ढकालले ११ रन बनाए पनि अन्य ब्याटरले दोहोरा अंकमा रन बटुल्न सकेनन् । बलिङमा कुँवरवर्तीका अन्जित क्षेत्रीले ३, आरोह विकले २ तथा दीप्सन पौडेल र रन्जित बावियाले १–१ विकेट लिए । अन्जित क्षेत्री प्लेयर अफ द म्याच भई पाँच सय रुपैयाँ प्राप्त गरे ।
यस्तै, दोस्रो खेलमा टस जितेर ब्याटिङ गरेको बृहष्पतिले ८ विकेट गुमाएर ७१ रन बनायो । उसका लागि मिलन मगरले २० र कोशिश ज्ञवालीले १७ रन बनाए । बलिङमा होराइजनका सुनिल लोधले ३, कुशल पौडेलले २ तथा शिवप्रसाद यादव, सहज अर्याल र शान अली मुसलमानले समान १–१ विकेट लिए ।
जवाफमा होराइजनले १३ ओभर ५ बलमा ५ विकेट गुमाएर ७२ रन बनाउँदै जित निकाल्यो । उसको जितमा सुनिल लोधले २१ र रवि पन्थले अविजित ११ रनको योगदान गरे । बलिङमा बृहष्पतिका प्रेम गुप्ताले ३ तथा अदनान खानले १ विकेट लिए । सुनिल लोध प्लेयर अफ द म्याच भई पाँच सय रुपैयाँ प्राप्त गरे ।
रुपन्देहीका ३० वटा विद्यालयकोे सहभागिता रहेको प्रतियोगिताको विजेता टिमले नगद ५० हजार र उपविजेताले २५ हजार रुपैयाँसहित ट्रफी, मेडल र प्रमाणपत्र प्राप्त गर्ने खेल संयोजक उदयकुमार मल्लिकले जानकारी दिए । यस्तै, म्यान अफ द सिरिजले १० हजार, बेष्ट बलर र बेष्ट ब्याटरले समान ५–५ हजार, प्रत्येक खेलको म्यान अफ द म्याचले ५ सय रुपैयाँ र अनुसाशित टिमलाई पनि पुरस्कृत गरिने आयोजकले जनाएका छन् । प्रतियोगिता पुस १ गतेसम्म चल्ने छ । प्रतियोगितालाई पर्वत ज्वेलर्स भैरहवाले प्रायोजन गरेको छ ।
