भैरहवा । सरकारले बजेटमार्फत् सुनमा २ प्रतिशत विलासिता कर र हिरामा १३ प्रतिशत भ्याट लगाएको विरोधमा रुपन्देहीका सुनचाँदी व्यवसायीहरूले बृहत् मोटरसाइकल र्याली र विरोध सभा गरेका छन् ।उनीहरूले सरकारले लगाएको अव्यवहारिक कर तत्काल खारेज गर्न माग गरेका छन् । रुपन्देही सुनचाँदी व्यवसायी संघको आयोजनामा तिलोत्तमाको मणिग्रामबाट सुरु भएको र्याली धकधइ हुदै देवदहको खैरेनीमा पुगेर विरोध सभामा परिणत भएको थियो ।
विरोध सभालाई सम्बोधन गर्दै वक्ताहरूले सरकारको निर्णय अव्यवहारिक भएको र यसले व्यवसायी तथा उपभोक्ता दुवैलाई मारमा पारेको बताए । लामो समयदेखि आन्दोलन गर्दा पनि सरकारले माग नसुनेको भन्दै उनीहरूले उक्त कर फिर्ता नभए अदालतसम्म जाने चेतावनी दिएका छन् । कार्यक्रममा व्यवसायीहरूले सरकारले लगाएको अव्यवहारिक करका व्यवस्थाहरू खारेज नभएसम्म आन्दोलन जारी राख्ने बताएका छन् ।
