बुटवल । लुम्बिनी प्रदेश प्रमुख अमिक शेरचनले गलत कामधन्दा गर्ने केही व्यक्तिका कारण राजनीतिप्रती बितृष्णा बढदै गएको बताउनु भएको छ ।
थकाली सेवा क्षेत्रीय समिति बुटवलले आज मंगलबार बुटवलमा आयोजना गरेको प्रदेश प्रमुखको बिदाई पूर्वको कार्यक्रममा बोल्दै उहाँले शक्तिमा पुग्नेहरूले जनताप्रति बेईमानी गरेका कारण असल राजनीतिज्ञहरूले शीर झुकाउनु परेको बताउनुभयो ।
प्रमुख शेरचनले भन्नुभयो सबैलाई गलत नजरले नहेरौ , शक्तिमा पुगेका थोरैले बदनाम गरेका छन । तिनलाई सजाय दिने मतदानबाट हो ।
उहाँले राजनीतिबिना कुनै पनि देश र जनताको उन्नति र बिकास संभव नभएको उल्लेख गर्नुभयो । जनताको सुख दुखमा साथ दिने मात्र राजनीतिज्ञ हुनेमा जोड दिदै प्रदेश प्रमुख शेरचनले राजनीति आफैमा खराब नभएको बताउनुभयो ।
देशमा भ्रष्टाचारका कान्ड छिनोफानो गर्नुको सट्टा लुकाउन खोजिएको भन्दै उहाँले असन्तुष्टि व्यक्त गर्नुभयो । कार्यक्रम थकाली सेवा समितिका अध्यक्ष लाल बहादुर गौचनको अध्यक्षतामा भएको थियो ।
