भैरहवा । रुपन्देही जिल्लामा अवैध लागु औषधको कारोबारमा संलग्न भएको आरोपमा एक व्यक्ति पक्राउ परेका छन् । जिल्लाको मायादेवी गाउँपालिका वडा नं. ४, सुण्डीस्थित लागु औषधको कारोबार भइरहेको भन्ने विशेष सूचनाको आधारमा खटिएको प्रहरी टोलीले ३२ वर्षीय हरि चन्द्र तेलीलाई पक्राउ गरेको हो ।
लागु औषध नियन्त्रण ब्युरो शाखा कार्यालय भैरहवा र इलाका प्रहरी कार्यालय लुम्बिनीबाट खटिएको संयुक्त प्रहरी टोलीले आइतबार तेलीलाई नियन्त्रणमा लिएको हो । सम्मरीमाई गाउँपालिका वडा नं. ३, थुमहवा निवासी तेलीले चलाएको लु ५८ प २२३१ नम्बरको मोटरसाइकललाई शंका लागेर चेकजाँच गर्दा उनको साथबाट ठूलो परिमाणमा लागु औषध बरामद भएको रुपन्देही प्रहरीले जनाएको छ ।
प्रहरीका अनुसार, मोटरसाइकलको लेगगार्डमा प्लास्टिकमा झुण्ड्याएर ल्याउँदै गरेको अवस्थामा १०० एम्पुल ब्रुर्फिन, १०० एम्पुल डाइजेपाम र १०० एम्पुल फेनेरागन गरी जम्मा ३०० एम्पुल लागु औषध बरामद गरिएको छ ।
पक्राउ परेका तेली र बरामद गरिएको मोटरसाइकललाई नियन्त्रणमा लिई थप अनुसन्धान कार्य अगाडि बढाइएको प्रहरीले जानकारी दिएको छ । यस घटनाले त्यस क्षेत्रमा लागु औषधको कारोबार सक्रिय रहेको देखाएको छ र प्रहरीले यस सम्बन्धमा थप अनुसन्धान गरिरहेको जनाएको छ ।
