भैरहवा । जिल्ला प्रहरी कार्यालय रुपन्देहीले भारतबाट भन्सार छली गरेर ल्याइएका मोबाइलका पार्टपुर्जा र एउटा भारतीय मोटरसाइकल गरी करिब १३ लाख रुपैयाँ बराबरको अवैध सामान नियन्त्रणमा लिएको छ। वडा प्रहरी कार्यालय बुटवलको टोलीले गस्तीका क्रममा बुटवल–९ ईटाभट्टी क्षेत्रमा बेवारिसे अवस्थामा भेटिएको युपी ५६ एन ६९२५ नम्बरको मोटरसाइकल जाँच गर्दा ४ हजार थान मोबाइल प्राइभेसी ग्लास फेला पारेको हो।
बरामद गरिएका १२ लाख बराबरको प्राइभेसी ग्लास र १ लाख मूल्य बराबरको मोटरसाइकललाई आवश्यक कारबाहीका लागि भैरहवा भन्सार कार्यालयमा बुझाइएको प्रहरी नायव उपरीक्षक सुरज कार्कीले जानकारी दिए। आसन्न निर्वाचनलाई मध्यनजर गर्दै प्रहरी उपरीक्षक प्रदिप बहादुर क्षेत्रीको नेतृत्वमा सीमा क्षेत्रमा निगरानी बढाइएपछि भन्सार छली र अवैध गतिविधि विरुद्ध रुपन्देही प्रहरीले कारबाहीलाई तीव्रता दिएको छ।
