भैरहवा । रुपन्देही प्रहरीले बुटवलबाट ठूलो परिमाणमा अवैध हुक्का तथा भेप (विद्युतीय चुरोट) बरामद गरेको छ। विशेष सूचनाका आधारमा इलाका प्रहरी कार्यालय बुटवलको टोलीले बुटवल उपमहानगरपालिका–११, कालिकानगरस्थित एक गोदाममा छापा मारेर करिब ४३ लाख २१ हजार ५ सय रुपैयाँ बराबरको सामग्री नियन्त्रणमा लिएको हो ।
प्रहरीले सो अवैध कार्यमा संलग्न रहेको आरोपमा ३५ वर्षीया पिङ्कु जयसवाललाई समेत पक्राउ गरेको छ। जिल्ला प्रहरी कार्यालय रुपन्देहीका प्रवक्ता डीएसपी कृष्णकुमार चन्दका अनुसार बरामद गरिएका सामग्रीहरूमा १५७ पिस भेप, १६० सेट हुक्का, ५५२ पिस फ्लेवर र १ हजार ४ सय २२ पिस कोइला रहेका छन्। यसका साथै ठूलो संख्यामा हुक्काको बेस, पाइप, एअर बलर, चिलिम र हिटर समेत फेला पारिएको छ। पक्राउ परेका जयसवाल र बरामद गरिएका सबै सामग्रीलाई थप अनुसन्धान तथा आवश्यक कानुनी कारबाहीका लागि भैरहवा भन्सार कार्यालयमा बुझाइएको प्रहरीले जनाएको छ।
