बाढी पहिरोले क्षति पु¥याएका रामेछाप र दोलखाको सडक मर्मतका लागि बजेट सुनिश्चित

रामेछाप । असोज महिनामा आएको बाढीले क्षति पुगेका रामेछाप र दोलखाका विभिन्न सडक निर्माणको लागि बजेट सुनिश्चित भएको छ ।

बाढीले क्षति पु¥याएका सडकको स्थलगत अवलोकन गरेर काठमाडौं फर्किएपछि भौतिक पूर्वाधार तथा यातायात मन्त्री देवेन्द्र दाहालले ती सडकहरूमा बजेट सुनिश्चितताको निर्णय गरेका हुन् ।  

मन्त्रालयले रामेछापको खुर्कोटदेखि मिल्ती सडक खण्डको मर्मतका लागि ४० करोड रुपैँया सुनिश्चित गरेको छ । सो सडक वर्षाको कारण विभिन्न ठाउँमा क्षतिग्रस्त भएको छ ।

यसै गरी मन्थली– चरिकोट सडक अन्तर्गत दोलखाको किर्ने–भोर्ले– ढोलीखोला सडक खण्डको लागि ४५ करोड रुपैँया बजेट सुनिश्चित गरिएको छ । सो सडकको किर्नेटारमा तामाकोसी नदीले सडक कटान गरेको छ । अहिले खिम्ति जलविद्युत आयोजनाको भित्रबाट अस्थायी रूपमा सडक सञ्चालन गरिएको छ । आयोजनास्थल भित्रबाट सञ्चालन गरिएको सडक बन्द गर्ने चेतावनी बारम्बार आयोजनाले दिँदै आएको छ ।

मन्त्रालयले मन्थली–चरिकोट सडकको मिल्ती–तामाकोसी सडक खण्ड मर्मतका लागि पनि बजेट सुनिश्चित गरेको छ । सो सडक खण्डका लागि २५ करोड रुपैँयाको बजेट सुनिश्चित गरिएको छ ।

यसै गरी चरिकोट–सिँगटी–झमार्सी सडक खण्डको लागि ३० लाख रुपैँया बजेट सुनिश्चित भएको छ ।  यस अघि झमार्सी सडकलाई २ करोड ३० लाख रुपैँया विनियोजन गरिएको थियो । त्यस्तै नेपालबाट चीनको तिब्बत जोड्ने दोलखाको लामाबगर नाका खोल्न २० करोड रुपैँया विनियोजन गरिएको थियो । सिन्धुपाल्चोकको मुढेबाट दोलखाको चरिकोट आउने सडक खण्डको लागि १५ करोड रुपैँया टेण्डर भइसकेको छ ।  

सडकमा पुगेको क्षतिको मन्त्री दाहाल, पूर्व मन्त्री पार्वत गुरुङ, सडक विभागका महानिर्देशक रामहरि पोखरेल सहितको टोलीले २ दिनसम्म स्थलगत अवलोकन गरेको थियो ।