परासी । प्राचिन कालदेखि नै ओझेलमा परेको पाल्हीनन्दन-४ लोहरौलीस्थित शिवपार्वती सिद्धधामलाई व्यवस्थित धार्मिक पर्यटकीय स्थलको रूपमा विकास गर्न निजी क्षेत्रले अग्रसरता देखाएको छ। उद्योग वाणिज्य संघ, पश्चिम नवलपरासीका अध्यक्ष ओम प्रकाश अग्रहरी नेतृत्वको टोलीले स्थानीयसँग छलफल गरी यसको विकास र प्रवर्द्धनका लागि योजना अघि सारेको हो।
पौराणिक मान्यता अनुसार शिवपत्नी सतीदेवीको अंग पतन भएको र पछि शिव भगवानले पुत्रहरू गणेश र कार्तिकेयलाई सोही स्थान देखाउन प्रकट भएको स्थलका रूपमा यो सिद्धधाम परिचित छ। तर, लामो समयदेखि सरोकारवालाको ध्यान नपुग्दा यो महत्वपूर्ण तिर्थस्थल ओझेलमा परेको थियो।
छलफलमा संघको टोलीले साउन महिनाभरि प्रत्येक सोमबार विशेष धार्मिक कार्यक्रम, जलार्पण, साँझमा आरती गर्ने र साउने मेला सञ्चालन गर्न सुझाव दिएको छ। धाम व्यवस्थापन समिति र स्थानीयहरूले यसमा सकारात्मक प्रतिक्रिया दिँदै छिट्टै कार्ययोजना बनाउने प्रतिबद्धता जनाएका छन्।
यसअघि तत्कालीन प्रमुख प्रशासकीय अधिकृतले विकासको योजना अघि सारे पनि उनको सरुवापछि काम रोकिएको थियो, जसलाई अहिले संघले पुनः अगाडि बढाउन खोजेको छ। सदरमुकाम परासीबाट करिब ४ किलोमिटर दक्षिणमा रहेको यो धामलाई पुरातात्विक रूपमा संरक्षण गरी राष्ट्रिय तथा अन्तर्राष्ट्रिय पहिचान दिलाउन सबै पक्षको सहयोग आवश्यक रहेको छलफलमा जोड दिइएको थियो।
