भैरहवा । रुपन्देहीको सिद्धार्थ राजमार्ग अन्तर्गत ओमसतियामा प्रहरीले विशेष जाँच अभियान सञ्चालन गरी लागूऔषध सेवन गरेर सवारी साधन चलाउने ८ जना चालकलाई नियन्त्रणमा लिएको छ। जिल्ला ट्राफिक प्रहरी कार्यालय रुपन्देही, वडा प्रहरी कार्यालय भैरहवा र सिटी अस्पतालको प्राविधिक सहयोगमा ओमसतिया गाउँपालिका-१, ठुटिपिपलमा गरिएको चेकजाँचका क्रममा उनीहरु पक्राउ परेका हुन्।
जिल्ला प्रहरी कार्यालय रुपन्देहीका प्रवक्ता एवं प्रहरी नायब उपरीक्षक गणेश सापकोटाले राजमार्गमा गुड्ने साना तथा ठूला सवारी साधनका चालकहरुमाथि गरिएको मादक पदार्थ (मापसे) र लागू पदार्थ (लापसे) परीक्षणका क्रममा ८ जनाले लागूऔषध सेवन गरेको पुष्टि भएको जानकारी दिए।
सडक सुरक्षालाई ध्यानमा राख्दै सम्भावित दुर्घटना न्यूनीकरणका लागि प्रहरीले पछिल्लो समय प्राविधिक उपकरण र स्वास्थ्यकर्मीको सहयोगमा सक्रियता बढाएको छ। प्रहरी नियन्त्रणमा रहेका चालकहरुका बारेमा थप अनुसन्धान प्रक्रिया अगाडि बढाइएको जिल्ला प्रहरी कार्यालय रुपन्देहीले जनाएको छ। सार्वजनिक सडकमा नशालु पदार्थ सेवन गरी सवारी चलाउँदा जोखिम बढ्ने भन्दै प्रहरीले यस्तो कडा निगरानीलाई निरन्तरता दिने बताएको छ।
