भैरहवा । गौतम बुद्ध अन्तर्राष्ट्रिय विमानस्थल नियमित रूपमा सञ्चालन नभएको भन्दै सिद्धार्थनगरका नगर प्रमुख इश्तियाक अहमद खाँको संयोजकत्वमा गठित संघर्ष समितिले प्रधानमन्त्री केपी शर्मा ओलीलाई उनको आसन्न भारत भ्रमणमा यही विमानस्थल प्रयोग गर्न आग्रह गरेको छ। समितिको मंगलबार बसेको बैठकले विमानस्थलको दिगो सञ्चालनका लागि सरकारलाई दबाब दिन यस्तो प्रतीकात्मक आग्रहसहितको पत्र पठाउने निर्णय गरेको हो।
समितिले प्रधानमन्त्रीलाई पठाएको पत्रमा अर्बौंको लगानीमा निर्मित राष्ट्रिय गौरवको आयोजना पूर्ण क्षमतामा सञ्चालन नहुँदा लुम्बिनी प्रदेशको समग्र विकास र समृद्धिमा नकारात्मक असर परेको उल्लेख छ। विमानस्थललाई लक्षित गरी पर्यटन र उद्योग क्षेत्रमा निजी लगानीकर्ताले गरेको अर्बौंको लगानी डुब्ने अवस्थामा पुगेको र यसले समग्र देशकै अर्थतन्त्रमा संकट ल्याउनसक्ने चेतावनी दिइएको छ।
प्रधानमन्त्रीले भैरहवाबाटै भारत प्रस्थान गरेमा विमानस्थल सञ्चालनप्रति सरकार गम्भीर रहेको सकारात्मक सन्देश जाने र स्थानीयमा रहेको निराशा कम हुने विश्वास समितिले लिएको छ। काठमाडौंका ठूला पर्यटन व्यवसायीको दबाबका कारण सरकारले यो विमानस्थल सञ्चालनमा चासो नदिएको स्थानीयको आरोप छ।
संघर्ष समितिले विमानस्थलको कार्गो भवन पनि तत्काल सञ्चालनमा ल्याउन माग गरेको छ, जसबाट स्थानीय कृषि तथा जडीबुटी उत्पादनको निर्यातमा सहज हुने बताइएको छ। समितिले आफ्ना माग राख्न छिट्टै प्रधानमन्त्री ओलीसँग भेट्ने र रुपन्देहीका सबै १६ वटा पालिकाका प्रमुखहरूलाई सल्लाहकारमा मनोनयन गरी आन्दोलनलाई थप सशक्त बनाउने निर्णय गरेको छ।
