असुरैना माविको अध्यक्षमा जैसमोहम्मद खान लगातार छैटौँ पटक चयन

मर्चवार । रुपन्देहीको सम्मरीमाइ गाउँपालिका वडा नम्बर ६ स्थित असुरैना माध्यमिक विद्यालयको विद्यालय व्यवस्थापन समिति गठन गरिएको छ, जसको अध्यक्षमा पुनः जैसमोहम्मद खान चयन भएका छन् । खान यस विद्यालयको व्यवस्थापन समिति अध्यक्ष पदमा लगातार छैटौँ पटक चयन भएका हुन् ।

विगतका कार्यकालहरूलाई स्मरण गर्दै अध्यक्ष खानले आफू सुरुमा अध्यक्षका रूपमा आउँदा उक्त विद्यालय प्राथमिक तह (कक्षा ५) सम्म मात्र सञ्चालित रहेको र विद्यार्थी संख्या पनि निकै न्यून रहेको बताए । तर, उनको निरन्तरको प्रयास र कुशल नेतृत्वका कारण अहिले उक्त विद्यालयले स्तरोन्नति भई माध्यमिक विद्यालयको रूप लिएको छ । विद्यालयका प्रधानाध्यापक राजकुमार केवाटका अनुसार हाल यस विद्यालयमा अध्ययनरत विद्यार्थीहरूको संख्या ३५० पुगेको छ ।

चयन भएका अध्यक्ष खानले यस क्षेत्रका बालबालिका तथा विद्यार्थीहरूको भविष्य उज्यालो होस् भन्ने पवित्र उद्देश्यका साथ आफूले सदैव अभिभावकको भूमिका निर्वाह गर्दै आएको उल्लेख गरे । समाजप्रतिको यही समर्पणका कारण स्थानीय अभिभावक, शिक्षक, राजनीतिक दल तथा बुद्धिजीवीहरूले आफूलाई निरन्तर रूपमा सहयोग गर्दै आएको र सोही बलियो साथ र विश्वासका कारण आफू अहिले छैटौँ पटक अध्यक्ष पदमा चयन हुन सफल भएको भन्दै उनले सबैप्रति आभार समेत व्यक्त गरे।