काठमाडौँ । नेपाल आयल निगमले पेट्रोलियम पदार्थको मूल्यमा भारी वृद्धि गरेको छ । निगमले बुधबार एक विज्ञप्ति जारी गर्दै डिजेल र मट्टितेलको मूल्यमा प्रतिलिटर ३० रुपैयाँले वृद्धि गरेको जानकारी दिएको हो । निगमद्वारा समायोजित नयाँ मूल्य सूचीअनुसार अब डिजेल र मट्टितेलको उपभोक्ता मूल्य साविकको भन्दा निकै महँगो हुनेछ । निगमले डिजेल र मट्टितेलमा ठुलो परिमाणमा मूल्य बढाए पनि पेट्रोलको मूल्य भने हाललाई यथावत् नै राखेको छ ।
यसैगरी, हवाई इन्धन (आन्तरिक तर्फ) को मूल्यमा पनि प्रतिलिटर ५ रुपैयाँले वृद्धि गरिएको निगमले जनाएको छ । निगमका अनुसार यो नयाँ मूल्य प्रणाली भोलि बिहीबार बिहान १२ बजेदेखि नै लागू हुनेछ । अन्तर्राष्ट्रिय बजारमा इन्धनको मूल्यमा आएको फेरबदलका कारण नेपालमा पनि मूल्य समायोजन गर्नुपरेको निगमको भनाइ छ । यस वृद्धिले सार्वजनिक यातायात र ढुवानीका साधनको भाडामा समेत प्रभाव पर्न सक्ने देखिएको छ ।
