भैरहवा । भैरहवास्थित भारतीय सीमा क्षेत्रमा रहेको झण्डीबजार (फरेनिया) हाटबजारमा नेपाली नागरिकको प्रवेशमा रोक लगाउने तयारी गरिएको छ। सिद्धार्थ उद्योग वाणिज्य संघ, रुपन्देहीको आयोजनामा भएको “खुला सिमाना तथा शान्ति सुरक्षा विषयक अन्तरक्रिया कार्यक्रम”मा सरोकारवालाहरूले नेपालीहरूको भारतीय बजारतर्फको बढ्दो आकर्षण र त्यसबाट सिर्जित सुरक्षा जोखिम तथा व्यापारिक असन्तुलनबारे चिन्ता व्यक्त गरेका हुन्।
रुपन्देहीका प्रमुख जिल्ला अधिकारी डा. टेकराज पाण्डेले सीमा सुरक्षा मजबुत पार्दै नागरिकलाई आफ्नै बजार र उत्पादनप्रति आकर्षित गर्न प्रशासन प्रतिबद्ध रहेको बताए। जिल्ला प्रहरी कार्यालय रुपन्देहीका प्रमुख एसपी प्रदीप बहादुर क्षेत्रीले बुधबार दिउँसो १ बजेदेखि फरेनिया हाटबजारमा जाने सर्वसाधारणलाई नेपाल प्रहरी र सशस्त्र प्रहरीको संयुक्त टोलीले रोक लगाउने जानकारी दिए। सशस्त्र प्रहरी उपरीक्षक मेखराज जोशीले खुला सिमानाको दुरुपयोग रोक्न र हाटबजारको भीड नियमन गर्न सुरक्षा व्यवस्था कडा पारिने बताए।
भैरहवा भन्सार कार्यालयका प्रमुख शिवलाल न्यौपानेले राजस्वमा असर पार्ने निकासी–पुर्ती नियन्त्रण गर्न भन्सार प्रशासन तयार रहेको बताए। सिद्धार्थ उद्योग वाणिज्य संघका अध्यक्ष नेत्र प्रसाद आचार्यले स्वदेशी बजारको संरक्षण, स्वदेशी उत्पादनको प्रवद्र्धन र शान्ति सुरक्षाका लागि सबै पक्ष एकजुट हुनुपर्नेमा जोड दिँदै प्रशासनको यो निर्णय स्वागतयोग्य भएको बताए। नेपाल उद्योग वाणिज्य महासंघका केन्द्रीय सदस्य राजेश अग्रवालले स्वदेशी उत्पादनमा उपभोक्ताको विश्वास जगाउनुपर्नेमा जोड दिए। यस निर्णयले स्थानीय बजारलाई सुदृढ पार्ने, स्वदेशी उत्पादनको खपत बढाउने र सीमा क्षेत्रको सुरक्षा व्यवस्थालाई थप बलियो बनाउने अपेक्षा गरिएको छ।
