रौतहट । रौतहटको लालबकैया नदीमा रहेको कमजोर तटबन्धका कारण वर्षेनी बस्ती र खेतीयोग्य जमिन डुबानमा पर्ने समस्या समाधानका लागि मर्मत, स्तरोन्नति र विस्तार गर्न माग गर्दै प्रधानमन्त्रीसमक्ष निवेदन दिइएको छ। तराई स्वतन्त्र न्याय मञ्चका केन्द्रीय अध्यक्ष एवं देवाही गोनाही नगरपालिका–४ खापटोल निवासी भाग्य नारायण बैठाले प्रधानमन्त्री तथा मन्त्रिपरिषद्को कार्यालय, सिंहदरबारमा निवेदन दर्ता गराउनुभएको हो।
निवेदनमा २०६८ सालअघि निर्माण भएको लालबकैया नदीको दुवैतर्फको तटबन्ध लामो समयदेखि मर्मत नहुँदा जीर्ण बनेको र वर्षायाममा सयौँ गाउँ डुबानको जोखिममा पर्ने गरेको उल्लेख छ। बैठाले पुल क्षेत्रदेखि देवाही गोनाहीको दक्षिण भारत सीमा तथा उत्तर जंगलसम्म दुवैतर्फ तटबन्ध विस्तार गर्न, कालोपत्रेसहित मर्मत सम्भार गर्न र सोका लागि आवश्यक बजेट तत्काल विनियोजन गरी निर्माण कार्य अघि बढाउन प्रधानमन्त्रीसँग आग्रह गर्नुभएको छ।
