परासी,। नवलपरासीको रामग्राम नगरपालिकामा लामखुट्टे भगाउन बालिएको आगो अनियन्त्रित भई सल्किँदा एउटा गोठ जलेर खरानी भएको छ भने दुईवटा भैंसी घाइते भएका छन् । जिल्ला प्रहरी कार्यालय, नवलपरासी (बर्दघाट सुस्ता पश्चिम) का अनुसार, रामग्राम नगरपालिका वडा नं. ६ पोखरापालीका बेचै यादवको खरले छाएको गोठमा आगलागी भएको हो । यादवले आफ्ना पशु चौपायालाई लामखुट्टेले टोक्नबाट जोगाउन गोठ नजिकै झारपात बालेका थिए । सोही आगो फैलिएर गोठमा सल्किएको प्रहरीले जनाएको छ ।
आगलागी भएको थाहा पाउनासाथ स्थानीय बासिन्दाहरू तत्कालै घटनास्थलमा पुगी आगो नियन्त्रणमा लिएका थिए । प्रहरी नायव उपरीक्षक तथा सूचना अधिकारी वीर दत्त पन्तले दिएको जानकारी अनुसार आगलागीबाट कुनै पनि मानवीय क्षति भने भएको छैन ।
यद्यपि, आगलागीमा परेर गोठमा बाँधिएका दुईवटा भैंसीको पछाडिको भाग जलेर घाइते भएका छन् । प्रहरीले गरेको प्रारम्भिक अनुसन्धान अनुसार आगलागीबाट करिब ४५,००० रुपैयाँ बराबरको क्षति भएको अनुमान गरिएको छ । घटनाको बारेमा थप अनुसन्धान भइरहेको प्रहरीले जानकारी दिएको छ ।
