भैरहवा । सुर्खेत जिल्लाको गुरुवाकोट नगरपालिका–१६ बडाखोलाकी १६ वर्षीया इनिशा बिकमाथि भएको जघन्य अपराधको घटनाप्रति नेपाल विश्वकर्मा समाज जागरण अभियानले गम्भीर ध्यानाकर्षण भएको जनाएको छ।
अभियानका संयोजक बिनोद रसालीले एक वक्तव्य जारी गर्दै उक्त घटनाले सम्पूर्ण समाजलाई स्तब्ध बनाएको बताएका छन्। उनले पीडित परिवारलाई न्याय दिलाउनका साथै उचित क्षतिपूर्ति उपलब्ध गराउन सरकारसँग माग गरेका छन्।
संयोजक रसालीले दोषीलाई कडा कानुनी कारबाही गरिनुपर्ने र आवश्यक परे कानुन संशोधन गरेरै भए पनि भविष्यमा यस्ता अमानवीय घटनाहरू दोहोरिन नदिने व्यवस्था गर्नुपर्ने बताएका छन्। साथै, यस्तो जघन्य अपराधमा संलग्न दोषीमाथि मृत्युदण्डसम्मको व्यवस्था गरिनुपर्ने माग समेत अभियानले अघि सारेको छ। समयमै दोषी उपर कारवाही नभए अभियानले देशव्यापी आन्दोलनको चेतावनी समेत दिएको छ । यसरी आन्दोलनबाट हुने जनधनको क्षतिको जिम्मेवारी राज्यले लिनुपर्ने अभियानक संयोजन रसालीले बताए ।
अभियानले यस दुःखद घटनाप्रति गहिरो दुःख व्यक्त गर्दै पीडित परिवारप्रति हार्दिक समवेदना प्रकट गरेको छ। साथै, शोकाकुल परिवारलाई यो असह्य पीडा सहन सक्ने शक्ति मिलोस् भन्ने कामना समेत गरिएको छ।
