भैरहवा । भैरहवा (गौतमबुद्ध) विमानस्थलमा रहेका तीन वटा विमानले शुक्रवार काठमाण्डौँका लागि उडान भरेको छ । गएराति बिहिवार साढे ९ बजे काठमाण्डौँबाट आएको बुद्ध एयरको विमान अवतरणको क्रममा धावनमार्गबाट चिप्लिएर विमानको चक्का घाँसेमैदानमा भाँसिएपछि विमानस्थलमा उडान र अवतरण अवरुद्ध भएको थियो ।
गौतमबुद्ध विमानस्थल कार्यालयका सूचना अधिकारी विनोदसिंह रावतले काठमाण्डौँबाट बिहिवार साँझ भैरहवा आएर रोकिएको अन्य तीनवटा विमान शुक्रवार दिउँसो पुनः काठमाण्डौँका लागि उडान भरेका छन् । उनले विमानस्थलमा रहेका विमानहरुको उडान भएपनि धावनमार्ग किनारमै बुद्धको विमान यथावत रहेकोले अवतरणका लागि विमानहरुलाई अनुमति प्रदान नगरिएको बताए ।
घाँसेमैदानमा भाँसिएको विमान अझै धावनमार्ग किनारमा रहँदा विमानहरुलाई अवतण गर्ने अनुमितमा रोक लगाइएको छ । बुद्ध एयरका प्राविधिक लगायतद्धारा विमान सुरक्षित तरिकाले निकाल्ने प्रयास भइरहको अधिकारी रावतले बताए ।
