जनकपुरधाम । राष्ट्रिय स्वतन्त्र पार्टी (रास्वपा) का सभापति रवि लामिछाने र उहाँकी धर्मपत्नी निकिता पौडेल यस वर्षको छठ पर्व मनाउन जनकपुरधाम आउने हुनुभएको छ । राष्ट्रिय एकता, सद्भाव र सामाजिक सहिष्णुताको सन्देश प्रवाह गर्दै उहाँहरूले जनकपुरधामस्थित ऐतिहासिक तथा पवित्र गंगासागरमा विधिपूर्वक छठ पर्व मनाउनुहुनेछ ।
रास्वपा मधेश प्रदेश कार्यालयद्वारा जारी तालिकाअनुसार सभापति लामिछाने २८ गते दिउँसो जनकपुर विमानस्थलमा आइपुग्नुहुनेछ । सोही दिन जनकपुरधाम उद्योग वाणिज्य संघको सभाहलमा शुभकामना आदानप्रदान, सम्बोधन तथा पार्टी पदाधिकारीहरूसँग अन्तरक्रिया गर्ने कार्यक्रम रहेको छ ।
कात्तिक २९ गते जानकी मन्दिरलगायत विभिन्न ऐतिहासिक तथा धार्मिक मठमन्दिरहरूको दर्शन एवं पोखरी अवलोकनपछि गंगासागरमा हुने छठ पर्वको पूजाअर्चनामा सहभागिता जनाउने कार्यक्रम छ । त्यसैगरी, कात्तिक ३० गते बिहान उदाउँदो सूर्यलाई अर्घ अर्पण तथा विधि अनुष्ठान पूरा गरी उहाँ जनकपुरबाट प्रस्थान गर्नुहुनेछ । मधेश प्रदेशका महामन्त्री मनिष कुमार साहद्वारा जारी यस सूचनामा पार्टीका सम्पूर्ण तहका पदाधिकारी, सांसद, सदस्य तथा शुभेच्छुकहरूलाई उपस्थितिका लागि अनुरोध गरिएको छ ।
