अर्घाखाँची । अर्घाखाँचीको शितगंगा नगरपालिकामा भोलि (पुस ९ गते) देखि 'चौथो शीतगंगा कृषि, पर्यटन तथा औद्योगिक व्यापार महोत्सव' सुरु हुने भएको छ। शीतगंगा उद्योग वाणिज्य संघको आयोजनामा हुन लागेको यस महोत्सवबारे संघका अध्यक्ष लक्ष्मण पन्थीले पत्रकार सम्मेलनमार्फत जानकारी दिनुभएको हो।
शितगंगालाई व्यावसायिक र पर्यटकीय हिसाबले देश–विदेशमा चिनाउनुका साथै स्थानीय कृषि तथा घरेलु उत्पादनको प्रवर्द्धन गर्ने उद्देश्यले महोत्सव आयोजना गरिएको अध्यक्ष पन्थीले बताउनुभयो। महोत्सवमा स्थानीय उत्पादन र प्रतिभालाई विशेष प्राथमिकता दिइने आयोजकको भनाइ छ।
महोत्सवको आकर्षणका रूपमा ठाडा डम्वरू दहमा स्टिमर डुङ्गा सञ्चालन गरिने प्रबन्ध निर्देशक सुशील केसीले जानकारी दिनुभयो। पुस २१ गतेसम्म चल्ने यस महोत्सवमा करिब २० हजार दर्शकले अवलोकन गर्ने र यसबाट स्थानीय उत्पादनको खपत बढ्ने अपेक्षा गरिएको छ।
महोत्सवमा राष्ट्रिय तथा स्थानीय कलाकारहरूको प्रस्तुति रहनेछ। संस्थाका संस्थापक अध्यक्ष चिन्ताराज अधिकारीले महोत्सव ऐतिहासिक र रचनात्मक हुने विश्वास व्यक्त गर्नुभयो भने पत्रकार महासंघका अध्यक्ष गणेश खनालले स्थानीय प्रतिभा र उत्पादनलाई विशेष महत्त्व दिन आग्रह गर्नुभएको छ। महोत्सवमा उल्लेखनीय सहभागिता रहने आयोजकले जनाएको छ।
