लुम्बिनी । ‘दीगो विकासका लागि बौद्ध शिक्षा र कुटनीति’ विषयक दुई दिने अन्तर्राष्ट्रिय गोष्ठी १५ बुँदे घोषणापत्र जारी गर्दै लुम्बिनीमा सम्पन्न भएको छ । लुम्बिनी बौद्ध विश्वविद्यालय, साउथ एसिया फाउण्डेशन र भारतीय राजदुतावासद्वारा संयुक्त रूपमा आयोजित गोष्ठीले बौद्ध दर्शनमा आधारित विश्वव्यापी शान्ति कुटनीति विस्तारमा जोड दिएको छ ।
गोष्ठीले लुम्बिनीलाई शान्ति अनुसन्धानको प्रमुख केन्द्रको रूपमा विकास गर्ने, ग्लोबल पीस इन्डेक्सको ढाँचामा ‘लुम्बिनी शान्ति सूचकांक’ स्थापना गर्ने, र विश्वव्यापी संकटमा मार्गदर्शन गर्न बौद्ध भिक्षु थिंक ट्यांकहरू गठन गर्ने जस्ता महत्वपूर्ण घोषणा गरेको छ ।
त्यस्तै, द्वन्द्वको पूर्वानुमान र गलत सूचना पहिचानका लागि नैतिक कृत्रिम बौद्धिकता (एआई) प्रणालीको विकास गर्ने, कूटनीतिज्ञहरूलाई द्वन्द्व समाधानका लागि माइन्डफुलनेसमा आधारित तालिम दिने, र नेपाल तथा भारतका बौद्ध तीर्थस्थलहरूमा एकीकृत शान्ति पर्यटन प्रवद्र्धन गर्ने निष्कर्ष निकालिएको छ ।
गोष्ठीमा नेपाल र भारतका कूटनीतिज्ञ, पूर्वराजदूत, विश्वविद्यालयका पदाधिकारी तथा बौद्ध विद्वानहरु सहित ५८ जना विज्ञहरूको सहभागिता थियो । समापन कार्यक्रममा लुम्बिनी बौद्ध विश्वविद्यालयका उपकुलपति प्रा.डा. सुवर्णलाल बज्राचार्यले गोष्ठीलाई आगामी वर्षहरूमा पनि निरन्तरता दिइने बताउनुभयो ।
