सिरहा । विगत केही सातादेखि तराई–मधेसमा जारी शीतलहरका कारण जनजीवन कष्टकर बनेपछि सिरहाका ७० विपन्न मुसहर परिवारलाई कम्बल वितरण गरिएको छ । विशाल ग्रुप फाउन्डेसनले जिल्लाका दुई स्थानीय तहका विपन्न बस्तीमा पुगेर राहत वितरण गरेको हो । फाउन्डेसनका अनुसार सखुवानन्कारकट्टी गाउँपालिका–२ पटनाका ४५ र लक्ष्मीपुरपतारी गाउँपालिका—४ धञ्छवारका २५ जना गरी कुल ७० जनालाई जनही एक–एक थान कम्बल प्रदान गरिएको छ ।
आज आयोजित वितरण कार्यक्रममा एनआइसी एसिया बैङ्क, लहानका शाखा प्रबन्धक लेखराज पौडेलले संस्थागत सामाजिक उत्तरदायित्वअन्तर्गत चिसोको जोखिममा रहेका परिवारलाई सहयोग गरिएको बताउनुभयो । कम्बल प्राप्त गरेपछि स्थानीय ५३ वर्षीया दृष्टिविहीन तेतरीदेवी सदायले खुसी व्यक्त गर्दै चिसोबाट जोगिन मद्दत पुग्ने बताउनुभयो । स्थानीय शिक्षक एवं समाजसेवी रामसुफल यादवले सहजीकरण गर्नुभएको उक्त कार्यक्रममा स्थानीयवासीले विपद्को समयमा हुने यस्ता मानवीय सहयोगले ठूलो राहत मिल्ने बताएका थिए ।
