काठमाडौं । सम्बन्धमा हुँदा साटासाट भएका गोप्य फोटो र भिडियोहरु महिलाका आफन्त र परिवारलाई पठाइदिएपछि एक व्यक्ति पक्राउ परेका छन् । प्रहरीले ती महिलाको चरित्र हत्या गरेको भन्दै काठमाडौंका एक व्यक्तिलाई पक्राउ गरेको हो ।
पीडित महिलाको उजुरीका आधारमा प्रहरीले नुवाकोटको शिवपुरी घर भई हाल काठमाडौंको टोखा नगरपालिका–११, बानियाँटार बस्ने २७ वर्षीय किरण थापालाई पक्राउ गरेको हो । उनीविरुद्ध गत पुस ८ गते महिलाले जाहेरी दिएकी थिइन् । तत्काल प्रहरीले थापालाई सम्पर्क गर्न खोजेपनि उनी फरार थिए ।
खोजतलास गर्ने क्रममा थापालाई काठमाडौंको गोंगबुबाट पक्राउ गरेको साइबर ब्यूरोका प्रवक्ता एसपी दिपकराज अवस्थीले जानकारी दिए । उनका अनुसार ती महिला र थापा सामाजिक सञ्जाल फेसबुकमार्फत् जोडिएर प्रेम सम्बन्धमा थिए । त्यही क्रममा उनीहरुबीच मेसेन्जरमार्फत् गोप्य फोटो र भिडियोसमेत एकआपसमा साँटासाट भएको थियो । तर पछि सम्बन्ध बिग्रिएपछि थापाले प्रेमिकाको फोटो र भिडियो उनको परिवारका सदस्य र आफन्तहरुलाई पठाएर चरित्र हत्या गरेका थिए ।
त्यसपछि ती महिलाले थापाविरुद्ध साइबर ब्यूरोमा जाहेरी दिएकी थिइन् । पक्राउ परेका थापालाई बिहीबारै जिल्ला अदालत काठमाडौंमा उपस्थित गराएर मुद्दा अघि बढाइएको प्रहरीले जनाएको छ ।
